يقول الله سبحانه وتعالى في سورة التوبة (وَالسَابِقُونَ الأوَلُونَ مِنَ المُهَاجِرِينَ وَالأنْصَارِ وَالذِينَ اتَبَعُوهُم بِإحْسَان ٍرَضِيَ الله ُعَنْهُم وَرَضُوا عَنْه وَأَعَدَ لَهُمْ جَنَّاتٍ...)
ربنا سبحانه وتعالى في الآية دي مقفلش الباب بالنسبة لينا احنا كمان علشان نلحق بالصحابة وقال الذين اتبعوهم بإحسان يعني احنا كمان ممكن نكون زي الصحابة اللي قعدوا مع النبي عليه الصلاة والسلام وشافوه واتكلموا معاه رضي الله عنهم أجمعين .. بس المهم اننا نتبع سنته صلى الله عليه وسلم ونعمل زيهم زي المهاجرين والانصار اللي بيتلخص عملهم في سياسة الترك والتضحية لله وده اللي عملوه المهاجرين وكمان نصرة الدين بالمال والنفس وده اللي عملوه الانصار.
المسلمين كلهم دلوقتي نفسهم يقابلوا الرسول ويتكلموا معاه ويكلمهم صلى الله عليه وسلم .. بس السؤال يا ترى احنا استعدينا للمقابلة دي؟
الموضوع مش كلام وعنترية وفتحة صدر احنا بنتكلم عن دين، والقضية مش اننا بنحب الرسول صلى الله عليه وسلم وعايزين نقابله ونشوفه ويشوفنا وخلاص المهم إنه لو حصل وشفناه لو سألنا عن أحوالنا وعن دينا زي ما كان بيعمل دايما مع الصحابة (كيف أصبحت يا حارثة) هنقدر نجاوب ونرد عليه زي سيدنا حارثة ما قاله (أصبحت وكأني أرى عرش ربي بارزا) دليل على قوة الإيمان .. طيب لو الرسول صلى الله عليه وسلم زار أي واحد منا في بيته النهارده يا ترى هيعجبه اللي هيشوفه؟ يا ريت كل واحد مننا يقعد مع نفسه ويفكر في الموضوع ده ويا ريت لو مش مستعد زي حالاتي، تبتدي تجهز نفسك من دلوقتي للزيارة ديه.
هناك 10 تعليقات:
السؤال مهم جدا و جزاك الله خير على طرحه. أنا بصراحة مش مستعدة أبدا لمقابلة الرسول صلى الله عليه و سلم لانى معملتش حاجة لنصرة دينه و لا شىء عملى يساوى حبى ليه. بس و الحمد لله بيتى مافيش فيه حاجة أخاف لو عليه الصلاة و السلام شافها يزعل منى لا صور و لا شرايط أغانى و لو شىء فيه ذهب و لا فضة و لا اسراف و الحمد لله و لا بشوف فضائيات و لا غيره بس دى كلها حاجات مادية أما الحاجات المعنوية فللأسف يمكن تكون مش موجودة يعنى برضة مش مستعدة.
السؤال خلانى افكر جعله فى ميزان حسناتك
ربنا يكرمك بجد سؤال حلو جدا ومحتاج الكل يفكر فيه واذا كانت على اجابتىفانا بفضل الله قبل مابعمل اى حاجة بقول لنفسى ياترى ربنا هيرضى عنها ولا لأ هتغضبه ولالأ ولذلك بتمنى انه يزورنى عشان يقيم ما افعله ولو فيه قصور عندى يوجهنى لاجتنابه
اد ايه بأتمنى اشوفه صلى الله غليه وسلم
بس مش معنى كده انى مستعده ..
بس املى فى رحمة ربنا اللى خالقنا وعالم بينا كبير ..بس حقيقى بأتمنى
انى استعد ونفسى اكون فخوره وانا بقابله .. مجرد امنيات لكن الحقيقة انى اضعف بكثير من كده اضعف قوى يمكن لانى غصب عنى بأحب دنيتى حتى ولو انى عارفه انها زايله .. نفسى
اقدر والله نفسى استعد .. ربنا يقدرنا جميعا وجزاك الله خير ووفقك لخير القول والعمل .
خالص تحياتى
rovy
السلام عليكم
أقول فى هذه المدونة بالغة الجمال
يارسول الله ولأنت ساكن مهجـتى
روحى فداك وكل ما ملكت يدى
أقول لكل من يريد ان يرى المصطفى
صلى الله عليه وسلم
أكثر من الصلاة عليه
يصلى الله رب العرش عشراً
على عبد يصلى على محمـد
وفى مائة يصلى الله الفاً
فعجل بالصلاة على مجمـد
فصل إن أردت رؤية النبى
فما جلى الصلاة على محمد
وأقول لك ياجنة
تهــجر الحبيــب وتزعم حبه
هذا لعمرى فى القياس شنيع
ان كنت تزعم حبه لأطعــته
إن المحـب لمن يحــب مطـــيع
وأتمن لك ان تحققى استعدادك
لمقابلة
الحبيب
دكتورة جنة
مهم جدا ان المسلم دايما يراجع نفسه ويشوف هو مقصر في إيه ويحاول يصلح من تقصيره ده.
زادك الله طواعية لله ورسوله.
موناليزا
ربنا سبحانه وتعالى يرزقنا مراقبة النفس ومحاسبتها وفعلا مهم جدا إن الواحد مننا قبل ما يقوم بأي عمل إنه يفكر فيه ويشوف إذا كان حلال ولا حرام لأن المشكلة إننا دايما بنندم بعد ما نعمل الغلط ومش عارف ليه مابنفكرش في الغلط قبل ما نعمله بس جايز علشان احنا من صنف البني آدميين يعني لازم نغلط علشان نتوب وبعدين نغلط ونتوب وهكذا بس ربنا يستر وملك الموت ما يجيش ما بينهم هما الاتنين وربنا يمهلنا لحد ما نتوب.
ربنا يسترها معانا جميع
روفي
الرسول صلى الله عليه وسلم قال للصحابة فيما معنى الحديث "وددت لو أني أرى أحبابي قالوا أو لسنا أحبابك يا رسول الله قال أنتم أصحابي لكن أحبابي يأتون في زمن بعدكم يؤمنون بي ولم يروني الواحد منهم بعشر قالوا منهم يا رسول الله قال بل منكم" لأن الصحابة كانوا بيلاقوا اللي يعينهم على الطاعة لكن احنا الآن في زمن القابض فيه على دينه كالقابض على الجمر.
متقلقيش من موضوع عدم الاستعداد فكلنا ذلك الشخص المهم اننا دايما نحاول ومانستسلمش للشيطان لأنه عاوزنا نفتكر ان مافيش فايدة بس لأ احنا الواحد مننا زي عشرة من الصحابة خليكي فاكرة ده كويس.
ياقوت
اللهم صلي وسلم على محمد وآله وصحبه وسلم.
شكرا على مدحك في المدونة وشكرا على تعليقك الجميل ونتمنى نشوفك معانا دايما.
مهم جدا اننا نصلي على محمد صلى الله عليه وسلم بس الأهم إننا نطبق سنته في الفكر والسيرة والسريرة نتشبة بأخلاقه وبمعاملاته صلى الله عليه وسلم لأن دي أفضل نصرة ليه.
اللهم صلي عليه وسلم تسليما كثيرا.
اخى الكريم walad masry
بقالك مده ما شرفتنيش على كل حال انا بأدعوك للاشتراك فى رابط لتجميع توقيعات المدونين لنصره الاسلام ورسولنا الكريم عليه افضل الصلاه والسلام ..
مستنيه زيارتك ولو انك مش متعود تتأخر كده علينا ..
خالص تقديرى وتحياتى
rovy
روفي
أشكر مرورك ودعوتك الكريمة
تم التوقيع بفضل الله
آسف على التأخير زحمة شغل والحمدلله عدت
تحياتي
إرسال تعليق